نص البودكاست:

نانسي: أهلا وسهلا فيكم بحلقة جديدة من بودكاست فاصلة من مشروع الألف، معكن نانسي واليوم في معي هيفا، اليسا، وحنكون عم نحكيكن عن الإجهاض.

 هالحلقة مختلفة شوي عن الحلقات اللي كنا نعملهم قبل لأنه هالمرة رح نحكي عن الإجهاض بطريقة تثقيفية، رح نفوت بالحقائق المتعلقة بالإجهاض بما إنه كموضوع بالمجتمع وحول العالم كتير مثير للجدل، مع إنه هو موضوع متعلق بالصحة بالتحديد بس في حواليه كتير أسئلة وفي حواليه كتير خرافات وإشاعات بتنتقل بالمجتمع لأنه هو موضوع سياسي. متل كتير قصص متعلقة بصحة النساء، تاريخيا كتير- المعلومات المتعلقة بصحتنا وبأجسادنا بتتغيب عنا أصلا من قبل المنظومة الصحية وبالتالي بيصير في عنا كتيرعراقيل قدام إنه نقدر نوصل للمعلومات ونقدر نوصل للخدمات اللي خصها بصحتنا خاصة الصحة الإنجابية، فلهيك حبينا شوي نتعرف على شو يعني الإجهاض وشو الخرافات المتعلقة حول الإجهاض وكيف بيصير الإجهاض ومن الأشخاص اللي عم يطلبوه هاي الخدمة حول المجتمع وكل الأفكار المغلوطة حبينا هيك نفككها شوي سوا.

أول شي ضروري كتير إنّو نعرف انه الإجهاض، مع إنه موضوع صحي، بس في كتير درجات بتفوت بقديش بتتغيب عنّنا معلومات، كتير درجات بتتعلق بالسياسة، درجات بتتعلق بالإقتصاد، درجات بتتعلق بالنظام الأبوي وبكثير أمور متل الدولة اللي نحن عايشين فيها، شو عدد السكان، شو هدف الدولة وسياساتها حول الإنجاب ولمين عم توجه رسائل معينة، حول مين بيصحله أو بيحقله إنّو يكون عم يجيب ولاد ومين ما بيحقله إنو يكون عم بيجيب ولاد، ولشو الدولة بحاجة كمان، لمين، بحاجة لعالم أكتر أو بحاجة لعالم أقل حسب الاقتصاد الموجود وحسب إذا بحالة حرب أو لأ، أو بحالة إحتلال أو لأ، فلهيك الموضوع معقد ومش بسيط ومافينا نحكيه خارج عن السياق ونفكر إنه الإجهاض هو شي صح أو شي غلط هيك بالعدم أو بالفراغ.

أول شي كتعريف بسيط الإجهاض هو إنهاء الحمل. هو خيار بتاخدو العديد من النساء وأحيانا بيفرض على النساء كتير، وبيتعلق بكتير أسباب يعني ما فينا نقول إنه العالم بيعملو إجهاض لأنه ما بدهم يكونو- ما بدهم يكملو الحمل تبعهم، أو العالم بيعملو إجهاض لأنو ما عندهم الظروف اللي بتسمحلهم، يعني ما فينا نعمم سبب واحد ليش ممكن حدا يطلب خدمة الإجهاض. الأسباب ممكن تكون متعلقة بصحة الشخص الحامل، ممكن تكون متعلقة بصحة الجنين، ممكن تكون متعلقة بظروف اجتماعية والاقتصادية، إذا معهم مصاري أو ما معهم مصاري، ممكن تكون تكون متعلقة بإنو بالسياق تبعن إذا هني مش متزوجين وعايشين بمجتمع ما بيسمح بإنو يكونو عم ينجبو خارج مؤسسة الزواج، بتتعلق بأمور خاصها بإنو عندها شخص أولاد كتير وما قادرة بعد تهتم بأشخاص أكتر، يعني الأسباب كتير متعددة وما فينا أكيد نشملها كلها ببودكاست واحد، بس كتير مهم إنو ما يكون في عنا صورة وحدة عن مين الشخص اللي بتطلب الإجهاض، وكمان ما يكون عنا صورة معممة عن مين هي هيدا الشخص اللي عم تطلب الإجهاض. لما نفكر دايما بالإجهاض وكيف بيتصور بالإعلام وبالمسلسلات وبالقصص، وبالتالي كيف بيأثر على نحنا، صورة الشخص اللي بتطلب الإجهاض، بالوعي تبعنا، دائما منفكر بنساء غير متزوجات، غير أمهات، عايشين بظروف ممكن تأدي لقتلهم إذا ما كملو الحمل، غير قادرات على إنو يعطو، أو غير قادرات على إنو يبنو عائلة أو أن يأمنو ظروف حياة ملائمة للأطفال تبعونن، فهاي الصورة كتير نمطية عن مين الأشخاص اللي بيطلبو الإجهاض وهي فعليا ما بتنعكس، يعني بالحقيقة الموضوع مختلف كليا.

فعليّاً حسب الدراسات، تقريبا نصف النساء اللي بيطلبو الإجهاض هني نساء أمهات، يعني عندهن أطفال، وبالتالي كل الأمور والأفكار والحكي اللي بينحكى عن النساء يلّي بتعمل إجهاض، لما ينحكى عنهن إنو هني ما فيهن يكونوا أمهات وإذا عملوا إجهاض يعني هني ما بيقدرو يكونوا أمهات أو رح يكونوا أمهات سيئات بالنسبة لأولادهن، هالشي بيسخف وبيبسط كتير قصة معقدة وهي إنّو أكيد عم نلغي كتير أسباب لي شخص ممكن يعمل إجهاض، وبنفس الوقت عم نسقط هاي الأفكار عن شو هي الأمومة المنيحة وشو هي الأمومة الخاطئة، لأنّو في نساء بيعملو إجهاض يمكن لأنو عم بيفكرو بالأولاد الموجودين عندهم already  وفي نساء بيعملو إجهاض لأسباب ما ضروري يكون خصها بالأولاد الي عندهن، بس بالنهاية الأمرين مش مرتبطين فعليا، والإجهاض ما بينقص من قديش الحدا ممكن يكون أم جيد.

غير هيك كمان المهم نفرق بين الإجهاض اللي بينطلب، يعني شخص بتروح بتطلب إجهاض، بيكون من قرار إتخذته بغض النظر عن الظروف، وبين التسقيط العفوي اللي هو بيصير مع النساء غصبا عنهن يعني بيصير في إجهاض للجنين بس هن ما أخدو شي ما أخدو حبة ما عملوا عملية، طبيعي صحيح. وهون أكيد منشوف كيف تفاعل المجتمع مع الموضوعين بيختلف، كيف إنو إذا في وحدة سقطت في حزن في تعاطف، وإذا في وحدة أجهضت وكان الموضوع فيه خيار، في تعييب وفي تهميش وفي إنو هيدا الشخص مش منيح وما فيها تكون أم منيحة، وغير هيك قديش نحن منفكر بالإجهاض كشي بعيد عننا كمان بيساهم بقديش منفكر فيه كشي خيالي وبيصير بيصعب علينا نحكي عن الحقائق المتعلقة فيه وقديش هو قريب على حياتنا، وهو فعليا حسب الدراسات كمان وحدة من ثلاث نساء بتقوم بالإجهاض بحياتها، ممكن أكتر من مرة ممكن مرة واحدة، بس إذا نحنا قاعدين ستة نساء على سبيل المثال بغرفة واحدة، يعني هالشي بيعني إنو في اثنين منا ممكن يكونو عملو إجهاض بحياتهم. وهالشي بيسهل علينا نعترف ونفهم قدّيش الإجهاض هو شي بيصير بعيلنا، بدوائر أصدقائنا، الأشخاص اللي منمشي ومنتعامل معهم بالطرقات، وهو مش شي عيب وبيصير بزوايا وبالخفاء، ويعني أكيد ممكن يصير من تحت لتحت حسب الظروف بس هو مش هالقد شي بعيد عن حياتنا اليومية، وأكيد يعني الأشخاص اللي بيعملوا الإجهاض مش بالضرورة هني أشخاص بيأيدو فكرة الإجهاض أو بيوافقو مع الإجهاض أو بيحبو الإجهاض هني ممكن يجو من مختلف الأفكار اللي إلها علاقة بالإجهاض ممكن يكونو أشخاص بآمنو بإنو هيدا شي حق، ممكن يكونو أشخاص بآمنو بإنو هو شي سيء بس متضرين يعملو بيوم من الإيام.

 فلهيك كتير مهم نبتعد عن التنميطات المتعلقة بالنساء اللي بتعمل إجهاض وبالإجهاض بحد ذاته لأنو هيدا الشي بيخلي أصعب علينا إنو نعرف الحقائق المتعلقة فيه، والمعلومات اللي نحنا عن جد بحاجة إلها ويلي هي صارت موجودة اليوم يعني نحن ما فينا نقول بال٢٠٢٠ إنو الإجهاض هو شي هيك mysterious  أو غامض، لأ هو شي صار عنا كتير معلومات عنه والعلم متطور لدرجة إنو صرنا منعرف كل تفاصيل الإجهاض إن كان التفاصيل الصحية والطبية أو إن كان التفاصيل على الإنعكاس النفسي والاجتماعي لهيك موضوع. حابة إنتقل هلّق لزميلتي إليسا اللي رح تحكينا أكتر عن الشق القانوني.

إليسا: القوانين حوالين العالم اللي بتجرم أو بتشرع الإجهاض بتختلف، في بلدان معينة بيكون القدرة على طلب خدمات الإجهاض محصور بإذا كان في خطر على حياة الشخص الحامل أو في خطر على حياة الجنين أو كمان إذا الجنين عندو أيا تشوهات، أحيانا بيكون مسموح فقط أو من الأشياء اللي مسموح فيها إن الشخص يروح ويطلب إجهاض إذا هو بحالة اغتصاب أو عنف جنسي، وفي بلدان بتسمح بالإجهاض لأسباب اجتماعية أواقتصادية او لأسباب نفسية أو لصحة الشخص الجسدية، وفي بلدان بحال طلب الشخص هيدي الخدمة ساعتها بتتوفر لإلهن. وفي ناس كتير بتفكر أو بتخاف إنو إذا تم تشريع الإجهاض إنو هيدا حيزيد من نسب الإجهاض بالبلد، وهيدا الشي مش مزبوط.

 إذا مناخد رومانيا البلد كمثال على هيدا الشي، برومانيا تم تشريع الإجهاض بسنة ١٩٨٩ ومن بعد ما تم تشريعه لاحظو إنخفاض كبير بوفيات الأمهات، يالأول زاد الطلب على الإجهاض بس بعد فترة زمنية رجع استقر هيدا الرقم خاصة من بعد ما صار في برامج لوسائل منع الحمل والتنظيم الأسري انتشرت أكتر، فلاحظوا أيضا إنخفاض بنسبة الطلب على الإجهاض وكمان الإجهاض الغير آمن أكيد.

وحوالين العالم إذا منشوف هني بس ثلاث بلدان اللي بشكل كلي بيجرمو الإجهاض حتى لو كان في خطر على صحة الشخص الحامل، وباقي البلاد بيكونو متل ما قلنا بيكونو متل ما قلنا مزيج من الحالات اللي ذكرتها  قبل، ومنلاخظ بالبلدان اللي فيها كتير تشديد أو كثير تضييق على الظروف، إنو قيود لحتى نساء تحصل على خدمات الإجهاض، هيدي عادة بلدان كانت تحت الاستعمار لسنوات عديدة وبعدو تأثير أو بعدن بقايا هيدي القوانين الاستعمارية بدستورن وعشان هيك مكفيين لحديت اليوم، وبالأماكن اللي بيصير فيها كتير إجهاض قسري مثلا بالصين بقانون الولد الواحد، منشوف كمان إنو بتزيد نسبة الجرائم ضد البنات أو وئد البنات أو إجهاض الإناث لأنو لما بتصير الناس مقيدة بعدد أولاد معين بيختارو إنو يجيبو أولاد صبيان.

هيفا: كمان في بلاد وين موضوع الإجهاض حسب الجنس أو لتحديد الجنس بيصير، متل مثلا بالهند، لاحظو إنو كان في كتير إجهاضات عم بتصير بس مع الحوامل يلّي حاملين بنات أو إناث، فقررو يحطو قانون كرمال يمنعو هيدا الشي بس هيدا الشي ما كان بصالح النساء الحوامل لأنو مش كل مرا حامل ببنت عم تجرب تأجهض، فبالعكس بس لحطو هدول القوانين صار هيدا الشي يتعارض مع القوانين المشرعة للإجهاض بالهند، فهيدا الشي خلا الدولة عنجد ترجع تكمش شوية سيطرة على موضوع الإجهاض وعلى مين فيه يأجهض ومي ما فيها، وبهالحال صار في كتير نساء بيتعرضو لنوع من المضايقات من الدكاترة ومن الدرك ومن قوى الأمن يلي بيفوتو كمان عند الحكماء وبيصيرو يسألو إذا عم يعملو أيا نوع من الصور الصوتية للنساء اللي حامل فوق العشر أسابيع تقريبا كرمال يعرفو إذا بوقتها فيهن يعرفو شو جنس الجنين، ما المفروض إن تأجهض من بعدها، هيدا الشي كان كتير ديّق للنساء اللي كان بدها تأجهض من بعد العشر أسابيع من الحمل، يعني هيدا الشي بالهند منو ضد القانون بس لأن نحط قانون ثاني لحماية البنات وبنفس الوقت كان مؤذي للنساء للحوامل أو الأمهات إذا هني كانو حابين يكملو الحمل.

 فأي في كتير إشيا يعني خلطات بفتكر لاحظنا مع إليسا على موضوع القوانين يعني في موضوع التجريم اللي بينحكى في كتير أكيد، إنو نشيل التجريم عن الإجهاض وكمان على تشريع الإجهاض، مثلا بعطي مثل إنو كندا من البلدان الوحيدة اللي شالو التجريم عن الإجهاض بس ما شرعوه. لي؟ لأن شافو إن الإجهاض هي عملية طبية، ما ضروري عملية جراحية بس إنو شي طبي، فبهاي الحال لي بدو ينحط قانون لتشريع أو لتجريم شي اللي فيه يكون مثل أيا فحص أو أيا تجربة طبية أو معاينة أو عملية، فكرمال هيك مثلا هيدا الشي مثلا بكندا زابط لإلهن، بس بمحلات ثانية بس ليصير في شراعات بين المنظومات النسوية أو لحقوق المرأة كرمال حقوق الإجهاض كتير بيصيرو عم يتخبطو مع السلطة الحاكمة أكان هنّي دافعهن شي ديني أو شي أكتر أخلاقي أو شي أكتر سياسي لأنّو هدول الثلاثة بيخلطو سو، بيصير- الشراعات دايما بتصير على موضوع على أيا جانب معلي المرأة تأجهض، مثل ما كانت عم تقول إلسيا في هدول الست أحداث اللي معقول وحدة تنزل فيهن يعني حسب القوانين بشكل عام، فهل هي إذا صار معها أيا نوع من أذا جنسي وإغتصاب، هل في تشوهات خلقية للجنين، هل إنّو وضعها صعب إقتصادياً واجتماعياً. فهيدول بيصيرو هني كأنو عم يلعبو فيهن إنو كأنو لعبة بتصير إنّو هيدي أي هيدي لأ، والسقيل بهيدا الموضوع بيصير يعني بيعمل نوع من، إنو هيدا إجهاض جيّد وهيدا إجهاض سيء وكرمال هيك نحن أكتر منحكي هون عن كل الأسباب اللي معقول الوحدة تنزل فيهن، من دون ما نقول إنو في سبب وجيه وسبب لأ يعني، بالآخر كل العالم عندها أسبابها، متل ما كانت عم تقول نانسي أول شي، إنو حتى في أشخاص اللي ما بيحبذو فكرة الإجهاض بس مضطرين يعملوها بنفس الوقت فهو هيدا الشي يلّي كمان عنجد بيبرهن إنو بالآخر هيدي عملية طبية. فيمكن بس نفوت شوي إنو شو هني أنواع الإجهاض، في النوع الجراحي وفي النوع الطبي. هلق الطبي قصدنا بالحبوب يعني، بس مبدئيا هلق بس عم نحكي عن الإجهاض الآمن، الإجهاض الغير آمن في مليونين طريقة بينعملو فيهن وهو من أوجه الأسباب لارتفاع وفيات الأمهات بالعالم يعني. وهو بيعتبر كمان عالمياً هو- هدول هني الوفيات اللي فينا نقضي عليهن، ما المفروض إن ولا وحدة تموت من ورا إجهاض غير آمن.

نانسي: حابة استفسر أكتر بما إن في كتير معلومات منتشرة حول الإنترنت و معلومات منتشرة بالمجتمع عن كيف الإجهاض بيصير، فكنت عم تذكري إن في إجهاض طبي وفي إجهاض جراحي، المعروف بالمجتمع إن الإجهاض الطبي اللي بيصير عبر الحبوب هو الإجهاض المش ناجح فعليا، شو الفرق بين الإجهاض الجراحي والطبي، بحب اسمع منكن الاثنين، وفعلياً كيف عم بيصيرو هالقصص بالجسم لأن الخرافات المنتشرة اونلاين كتير رهيبة وكتير بتخوف الأشخاص وكتير بتخلي الأشخاص يحسو انو الشي يللي عم بيقومو فيه شي كتير خطير وشي مجرم ويصير في مشاعر كتيرة يعني سهل نحرك المشاعر بالمجتمع بموضوع الإجهاض، فكتير مهم يكون في عنا معلومات طبية علمية عن الموضوع.

هيفا: فجراحيا بفتكر هيدي هي من أقدم الوسائل المعروفة وهي أكتر شي عليها شوية وصمة لأنها بتنعمل بطرق كتير منا آمنة فمعروف ليش في كتير عالم بتخاف من الإجهاض الجراحي لأنو فعلا كان في كتير التهابات بتصير من زمان وكان في كتير كمان نزيف يصير من بعدهن. بس مبدئيا خلينا نبلش بس نقول إنو كل أنواع الإجهاض إذا آمنة مافي شي أبدا بيخوف منهن، يعني هني بيعتبرو من أسلم السيرورات الطبية إذا بدك، الإجهاض بشكل عام هو سليم مقارنة بكل العمليات الطبية والجراحية يلي بتصير كمان. وهيدا الشي منو كتير واضح بفتكر لكتير عالم، ومضبوط إنو هيدا الخوف قديم، بس كرمال نتخلى عن هيدا الخوف لازم نعرف ليش ما ضروري نخاف بقا من هيدا الشي.

جراحيا مثلا العالم كتير بتعرف كلمة   الكورتاج صح؟ بتنعاز كتير، في أقل، ما كتير بينحكى بالموضوع الشفط، بس هو في بالإجمال في الشفط يلي هو يدوي والشفط يلي هو كهربائي، مش عكهربا هو عملية الشفط بتصير بواسطة إنو يكون في عالكهربا والثانية يلي يدوية. فخلينا بس نبلش إنو نقول الكورتاج قديم ، وإنو منظمة الصحة العالمية الWHO من ال٢٠١٢ حاطين إنو الكورتاج ما لازم يستخدم كرمال إنهاء الحمل، مع إن كتير بيستخدم، هلق ما معناتها إنو الكورتاج  بحد ذاته مؤذي، هو حسب كيف بينعمل أكيد مثل أي شي تاني، بس الكورتاج المهم إن نعرفه هو شوي بيعتبر مفرط، إنو ما ضروري إنو كرمال ننهي حمل نستخدم وسيلة اللي معقول تكون مؤذية حسب الأيد أكيدة إذا حدا معود أو إذا لطيفين. وهو شو هو الكورتاج، هو تجويف باطن الرحم بس بآده حادة وكرمال هيك كتير عالم بيقولو إنو يمكن إن حدا يمكن ما تقدر تجيب ولاد من بعد الكورتاج، هو ما المفروض هيدا الشي يصير إلا إذا عنجد كان الشخص اللي عم بيعوز هيدي الأدوات الحادة، يعني عم يعملوها بطريقة قاسية، قاسية هيدي عم قولها بطريقة حلوة يعني، فهاي شغلة. فهني هلق كطرق الشفط أحسن وسائل للإجهاض الجراحي، في الشفط اليدوي والشفط الالكتروني يلي على استخدام الكهربا، هني هدول الاثنين بيستخدمو حتى اربعة عشر أسبوع من الحمل، يلي تلات أشهر وشوي يعني تلات أشهر يعني بيضل فيهن يستخدمو. والمنيح فيهن هو يعني انو، هلق بفتكر يمكن حنشوف شو هني الأشياء المنيحة والسيئة يلي بكل وسيلة، بس الثقيل فيها هي انو بالإجمال بتكون شوي غالية، ويعني حسب عند وين الشخص بيروح، بس بشكل عام بس لأيا شي بيكون مجرم وما بينعمل بشكل علني بيصير يعني الطلب عليه بيختلف من محل للثاني وأكيدة بما إنو في كتير نوع من ال- بيشوفو المقدمي الرعاية الصحية نوع من يأس، يعني أحيانا في استغلال لهيدا الشي. بس هي وسيلة الشفط يلي هي اليدوية هي بتكون مثل ابرة كبيرة بس بدون الابرة الحديدة يعني هي ابرة سيرنج يعني بلاستيك، وبالآخر بيكون في نوع من، نوع من انو كأنو شريمونة، يلي بواسطتها يعني حقول شرموني بتختلف بالحجم يعني حسب فترة الحمل، وبيصير شفط من عبر انو ينسحب الهوا والمكونات داخل الرحم بقلب السيرنج او بقلب الابرة. وهيدا الشي ما المفروض ابدا يكلف مصاري يعني حتى حتى اذا بتشوفو عالانترنت بتلاقو انو حقها يمكن شي ٥ دولار او ١٠ دولار حق كل هيدا الشي سوا وهو بيستخدم مرة وبينكب كمان اكيد، بالشفط الالكتروني ما بيستخدم مرة وبينكب هو بيكون شي دايم بالعيادة، فكل هدول ما ضروري يصيرو بمستشفيات يعني ممكن يكون بعيادة خاصة او بعيادة خارجية ما ضروري يكون بمستشفى ما ضروري يكون بقوضة عمليات وهيك.

بس وهي الوسيلة نفسها متل الشفط اليدوي تاعت الكهربائية، بس هي الفرق انو ما بتنكب المكنة اكيدة بتضلها هونيك وبتتغير بس كم شغلة فيها بين مريضة ومريضة. وبس من المهم انو كمان ينقال انو في كتير نحن منسمع خبريات انو في كتير عالم بتفوت مستشفيات يعني بتنام بالمستشفى كرمال اجهاض بالكورتاج وهيك، هيدا الشي يعتبر كمان هيك مفرط وفي كتير مصاري وفينا نحكي فيها بوقت تاني، بس هني هدول الاشيا فيهن ينعملو بالعيادات اكيدة للأربعة عشر أسبوع الحمل. فهيدا عن الإجهاض الجراحي ما بعرف إذا نسيت- اه بس شغلة. الشي الوحيد يلي في العالم بتخاف منه هو الالتهابات والنزيف، فالمنيح بالجراحي هو بنفس الربع ساعة الثلث ساعة يلي هي بدها وقت هيدي بالآخر هيدا الوقت يلي بحاجة اله كرمال ننهي هيدا الحمل، يعني من بعدها خلص بيبطل في نزيف بيبطل في دورة فبتخلص القصة بنفس هاي ال٢٠ دقيقة كمان المنيح فيه انو، انو اذا مثلا حسب حياة الشخص انو اذا عندها شغل برات البيت اذا بدها تكمل الشغل او بدها تخلص من هالحالة لسبب معين دغري، كمان في هيدا الشي منيح بس مثل ما قلت غالي، وكمان نتحتاج انو تحكي مع مقدم او مقدمة الرعاية الصحية فإذا هيدا الشخص او الدكتورة عندهم أيا  نوع من وصمة على الإجهاض معقولة تسمع حكي معقولة يصير في نوع من مضايقات وهيدا الشي صعب كمان، وموضوع الالتهاب أو يكون في التهابات هيدي بس اذا كانت الوسيلة يعني منها معقمة، لأن الرحم معقم فلازم تكون الأدوات اللي عم تستخدم معقمة كمان، بس غير هيكي ما المفروض يكون في أيا إشكالية هيك، وما المفروض يكون في حتى نزيف الا اذا ضل في بقايا بالرحم بس كمان لأن بأي حال وهلق رح تحكي شوي عن الموضوع اليسا انو اذا بأي حال إذا في نزيف، انو في كمان حل لهيدا الموضوع انو ما ضروري انو حدا يتأذى أو تنأذى من هيدا الشي.

نانسي: شكرا كتير هيفا.

هيفا: سوري، طولت شوي؟ ما كان قصدي.

نانسي: لأ. فالخرافات مثل ما وضحتي هلق كتير موجودة عن الإجهاض الجراحي بس بعد في كمان خرافات أكتر ومعلومات أكتر مغلوطة عن الإجهاض الطبي، مش بس إنّو الإجهاض الطبي أو الحب ما بيشتغل ومش منيح ومش قد الefficiency  تبعت الإجهاض الجراحي، بس كمان انو كيف منوثق بالنساء إن ياخدو حبوب ويتعاملو مع الإجهاض بالبيت تبعن بدل ما إنّو يكون هيدا الشي عم بيصير داخل المستشفى اللي عندها طبعا شرعية اكتر لذا كان فينا نعمل فيها عمليات متعلقة بأجسادنا مع انو منعرف تاريخيا انو النساء كانو عم يعملوا الإجهاض بمساحاتهم الخاصة ببيوتهم من دون ما يلجؤوا للمؤسسة الطبية، إذا فيكي اليسا تحكيني اكتر عن الإجهاض الطبي وتوضحي بعض الأفكار المغلوطة حولهم.

اليسا: أي أكيد، متل ما ذكرتي نانسي انو في كتير أفكار مغلوطة حوالين هيدا الموضوع والخرافات ما بتجي بس منّنا بعضنا وشو منسمع ومن الانترنت بس أحيانا بتجي كمان من دكاترة وشو منسمعهم يخبرونا عن الإجهاض الطبي. الإجهاض الطبي بيصير عن طريق الحبوب، في نوعين من الأدوية الموجودين حسب البلاد المختلفة تحت أسماء مختلفة بس هي اسمهم الطبي الMisoprostol والMifepristone وهدول بيتاخدو. يعني في بلدان موجودة فيها واحدة بس اللي هي الMisoprostol فيه يتاخد بطريقة معينة، وكمان إذا موجودين الدوائيين متوفرين بالبلد وقادرة النساء تحصل عليها، كمان بتزيد من فعاليتها. ف-

نانسي: الMisoprostol هو ذاته الCytotec؟

اليسا: أي، هو نفسه.

نانسي: اوكي.

اليسا: فبتتراوح فعالية هيدي الطرق بين ال٨٥٪ اذا بس Misoprostol لل٩٥٪ إذا الMifepristone موجود. وفي حتى منظمة الصحة العالمية عطول كل فترة بتنشر الطريقة، الطرق الأفضل لاستخدام هول الدوائيين وكيف بيتاخدو حسب شو اللي موجود، والتفاصيل موجودة على الwebsite اللي الهم كمان.

هيفا: بس خلينا نقول انو كمان هيدولي النصائح اللي كيف يستخدموا الحبوب كتير تغيروا بآخر فترة يعني من آخر عشر سنين لحاله كتير تغيرت الوسيلة، كرمال هيك كمان منلاقي كتير أوقات كتير أشخاص تستخدم الحبوب بطريقة غلط، ويعني نشر الوعي عن كيف يستخدموا الحبوب كتير بتختلف لأنو عم يتغيروا الأبحاث بعدو عم يطلع أحسن وسائل الاستخدام، بس بفتكر هلّق آخر ٥ سنين بفتر ركزنا على كم طريقة.  سوري قطشتك اليسا ما كان قصدي.

اليسا: لأ لأ، لأ عادي، أي وكمان احيانا بتجي المعلومات أو الطرق إنّو كيف تاخديهن غلط من بعض الدكاترة، يا لأنو هني مش كتير متابعين مع الأبحاث الجديدة، بس كمان مثل ما كنت عم تحكي هيفا إنو في مصاري وفي دفع أكتر بالطرق الجراحية فأحيانا بيتم الترويج لنوع واحد من الإجهاض اكتر على انه هو آمن أكتر أو فعال أكتر بس لإنو بدنا ندفّع نساء أكتر مقابل خدمة هني قادرين يعملوها ببيوتهم بأمان بخصوصية اكتر.

هيفا: بس كمان في شغلة عن الحبوب، انّو الحبوب متل ما كنتي عم تقولي أرخص، أرخص بكثير، يعني الحبوب بحد ذاتهم يمكن العلبة الCytotec بلبنان يعني حقها ١٣ الف، هيدا قبل ما بفتكر يخلوه، بس ١٣ الف وفي ٢٨ حبة، وهدول ال٢٨ حبة يعني بيعملو إجهاضين حتى، بس هي الفكرة انو بيعتبر رخيص. هلق الحبة لMifepristone هي منها مسجلة ومنها موجودة بلبنان هاي أغلى بشكل عام بس هي بأي حال منها موجودة هون لأنو هي استخدامها هو بس للإجهاض الأمن، بس الCytotec أو الMisoprostol هو لاشيا تانية فهو كرمال هيك هو موجود، هو الMisoprostol هو بيعتبر حتى من الأدوية الأساسية وهو على ليستة الأدوية الأساسية كمان لمنظمة الصحة العالمية فأكثرية البلدان عندن الMisoprostol، - اليسا: إي ما بينقطع - أي ما المفروض، حتى بيستخدم بتوقيف النزيف المفاجئ، بالولادات أو بعد الولادات أو في أيا مشاكل خاصة ببلاد ما في كتير مستوصفات أو مراكز عناية صحية لمسافة بعيدة، أكثرية القابلات أو الداية او الأشخاص اللي بتكون مع النساء هي وعم تولد بيكون عندن Misoprostol أو Cytotec لأنو عنجد هو بينقذ حياة نساء بس تكون عم تنزف. وهو النزيف بيصير يمكن كان لازم نبلش نقولها هاي من الأول نانسي بس انو النزيف كتير بيجي، في عالم كتير بتخاف من النزيف بالإجهاض بس هو أكتر شي بيصير بالولادات، يعني الولادات طبيا بتعتبر أخطر بكثير من الإجهاض الآمن، دائما منقول الإجهاض الآمن يعني هو بفتكر يعني منّي مأكدة إذا الرقم مضبوط عالقد، هو ١٥٠ مرة أخطر إنو وحدة تولد من انو وحدة تجهض، اتنيناتن بمكان آمن وهيك. وليش، لأنو أكيدة بالولادة بيكون الجنين متكمل وبحجمه الكامل ومعقول يصير في نزيف، يعني هني من الاشياء اللي ما فينا نتوقعها قبل بكثير وقت. بس بالإجهاض وأكثرية الإجهاضات بتكون انو بفترة بعدها بكير بالحمل، يعني في كتير عالم بتفكر انو ييي الإجهاض انو حرام وانو بيكون بفترة متقدمة، بس هو فعلا ٨٠ أو ٨٥٪ من كل الإجهاضات بتكون بأول مرحلة الحمل يللي هي ثلاث اشهر مش من بعدها، وهيدا الشي يلي بعتقد من الخرافات الكبيرة اللي عن الإجهاضات إنو بيصيرو للآخر انو هي بتكون وحدة كأنها عم بتولد وبتقرر يا بولد يا بسقط، مش مضبوط الشي أبدا.

نانسي: هيك الفيديوز يلي بيفرجوكي ياهن اونلاين انو حدا، جنين ٩ أشهر عم بقطعوه

هيفا: أي مضبوط، مضبوط في كتير بروباغاندا عن هيدا الموضوع، بس انو هو كتير آمن انو الوسيلة مما العالم بتفكر، انو ام... أي

اليسا: حتى هني كحبوب هني كتير آمنين على صحة النساء يعني، انو ما في أيا مضاعفات تبقا بعد، يعني بالفترة اللي بتكون عم تاخدهن هي في نزيف وفي وجع وفي عوارض تختبرها النساء هني وعم يمرقوا بهيدي المرحلة، بس من بعدها مافي أيا تأثير أو عوارض إنو على فرصهن إنو يحبلو بالمستقبل أو صحتهن الجنسية أو الإنجابية فإنو كمان هيدي كمان -

هيفا: هيدي كمان من الخرافات إنو إذا أجهضت هيدا الشي حيأثر على خصوبتك، بس أحيانا يعني ماني مأكدة إذا هيدي خرافة كليا، من زمان بس لكانو الجراحة عنجد منن آمنين، بيجوز إنو أكيدة إذا الكورتاج نعمل بطريقة وحشية، أكيد إنو معقولة انو المرأة انو تأدي إلى العقم، لأنو بيكون انو مؤذي كتير أو صار في نزيف كتير أو، انو اضطرت إنو تعمل عملية أو، في كتير أوقات انو ببلاد تانية كمان نساء هي وعم تعمل اجهاضات معقول، انو في نساء اللي هني يفرض عليهن العقم متل مثلا صار بالبرازيل انو هني نساء عم تولد، بس مش بالإجهاضات انو بعد الولادة، بس انو أكيدة بس يلي عم قولو انو، انو مزبوط انو هيدي خرافة، في كتير عالم بتخاف، انو مش بس طبيا انو بيفكرو انو اذا أنا نزلت، معناتها انو أنا أتعاقب وما فيني ارجع جيب ولاد، ففي أشيا هيك يعني ما بتعرفي من وين جاية أخلاقيا، دينيا، كونيا، انو في غضب بدو ينزل أو طبيا بس انو كل شيء أكيدة إله أبعاده الحقيقية بس لهلق خلينا نقول انو هيدا الشي بطّل، منّو حقيقي. سوري كان بدك تقولي شيء نانسي؟

نانسي: كان بدي زيد انو غير الجانب الطبي للعواقب تبعت الإجهاض اللي بينحكى عنا كمان في الجانب النفسي، يلّي هو دائما منحكي عن النساء اللي بيقومو بالإجهاض انو عادة رح يتعرضو لكئابة وحيفوتو بفترة كتير حزينة ومؤلمة وصعبة نفسيا، هو بالحقيقة فعليا كتير في نساء بيمرو بهاي الأمور، خاصة إذا كان هو حمل كانوا رغبانين فيه بس الظروف ما بتسمح إنو يكملو بالحمل، ولهيك أخدو قرار الإجهاض أو كانو عايشين بظروف معينة، مش ضرورة يكون الحمل مرغوب أحيانا انو بسبب العوامل اللي موجودة بالمجتمع وقديش نحن بتنفرض علينا من نحن وصغار فكرة الأمومة وانو أي اجهاض هو خسارة فرصة معينة لأنو نكون أمها. وإذا كمان إذا كان عنا أطفال already وعم نفكر إنو هيدا الشي بأثر علينا وعلى مفهومنا لقدّيش نحن أمهات جيدات، أكيدة هيدا الشي بأثر علينا بطريقة نفسية، وبنفس الوقت المهم نعرف إنو بالحقيقة كمان غير القصص الصعبة والأثر الصعب للإجهاض على كتير نساء، كمان بتفرجينا الدراسات انو الشعور اللي فعليا أغلب النساء بعد الإجهاض بتحس فيه هو شعور بالراحة، والراحة هاي ممكن نفسرها بكثير طرق، إن كان انو ارتحنا من حمل كنا مش مرتاحين فيه، او طلعنا من مأزق ما، اذا كملنا بالحمل كنا منكون بخطر معين، أو إنو فكرة إنّو عم نخبي هيدا الموضوع عن المجتمع عم نعمله بالخفاء من تحت لتحت، وبظروف أحيانا بتكون كتير صعبة إن كانت مادية أو كانت تعامل مع الأطباء سيء وبيوتر، فكلها أمور بتأدي إنو أغلب النساء بتحس بعد الإجهاض إنو ارتاحوا من شيء كتير صعب كانوا عم بيمرو فيه بسبب الأثر تبعه، فلهيك كتير مهم نعرف إنو شو الأرقام بتقلنا عن قديش في راحة بالموضوع، وكمان نسمع قصص النساء لما يعبروا عن الوجع والألم اللي ممكن يمروا فيه نفسيا بعدها، وما نقول إنو في شعور أفضل من شعور، فعليا الموضوع كتير بيرجع للشخص اللي عم يقوم بالحمل وشو الظروف اللي عم تقوم بالحمل خلالها.

هيفا: اي بس بفتكر في كتير عالم كانت، يعني هي فكرة انو المرأة لازم تزعل من بعد ما تنزل كان شيء كتير شائع، ولأنو كان، كمان في كتير، في كتير عالم اللي بناصرو ضد الإجهاض، هني كانو كتير يحطو هالشي يقولو للعالم انو أنو أكيدة في نوع من الإحساس بالذنب وهيك، ففعليا كان في مساحة كتير صغيرة للأشخاص اللي ما حسو إنّو، حسّوا إنّو خيارهن كان بمحله ما كان في الهن كتير محل ليحكو بهالشي، متل ما قلتي نانسي انو بحسو حالن انو يمكن العالم بتطلع فيهن بطريقة تانية أو إنو هني لازم يكونوا زعلانين وشو الغلط فيي إنو أنا مش زعلانة. أكيدة هيدا الشي بيرجع لوضع كل شخص وقدي كان صعب كمان الها انو هي تلاقي هالخدمة لأنو بكتير من البلاد، انو لبنان مثلا يعتبر انو أكثرية الإجهاض مجرّم، بس هو مشرّع بحال حياة المرأة هي بخطر، فهون يعني أكيد في كتير أشخاص بتلاقي صعوبة إنو تلاقي هيدي الخدمة، فإنو إذا حدا ضلن عم بيروحو من مقدم لمقدمة، لمقدمة رعاية صحية تانية أو صيدليات وتبرم وهيك، والعالم عم تحكيها، ورفقاتها عم بيسمعوها حكي أو مخباية هيدي الموضوع عن يا الشريك يا الأهل يا شو ما كان، بأي وضع كانت فيه، أكيد هيدا الشي بيسبب أنواع كبيرة من الإرهاق النفسي ومن الخوف ومن التوتر، فهيدا الشي يعني أكيدة شو ما كان حيسبب لراحة بالآخر حتى لو كانت يمكن عملية الإجهاض صعبة انو معناتها كانت كتير موجعة أو في عوارض جانبية كثيرة بتضلي تلاقي انو من بعد ما حدا يتخطى كل هالصعوبات يحسو انو هني مضطرين يخبو شي، شي مثل ما قلتو أول شي انو مرأة من ثلاث نساء بحياتها حتنزل، فهيدا مش رقم صغير، هيدا رقم كتير كبير لشي كتير مخبا بفتكر.

هيفا: انو في كتير عالم بتفكر انو الحب ما بيزبط، انا نسيت قول قبل انو الوسيلة الجراحية ناجحة كتير يعني، ٩٩٪ تقريبا فكرمال هيك يعني في فرق بين الوسيلة الجراحية والوسيلة الطبية، برضو الوسيلة الطبية كتير ناجحة يعني هي بين ال٨٥ وال ٩٥٪ إذا بس Cytotec لحاله، إذا Cytotec مع الMifepristone اللي مانو موجود بلبنان، بيوصل لل٩٨٪ من الفعالية اللي هي فعالية كتير عالية، بس في كتير عالم هون بيقولو لأ هو نص نص، ٥٠٪، يمكن تزبط يمكن ما تزبط، وبيكون لأنو عم ينعطا الدواء بطريقة غلط مش انو عم ياخدو اربع حبوب ال Cytotecاللي هي ٢٠٠ميكروغرام تحت اللسان كل تلات ساعات ليكون بلش النزيف، انو النزيف الطبيعي مش النزيف الغير طبيعي أكيد، فمش عم بيكونو عم ياخدوها بهالطريقة، بيكونو عم ياخدو بطرق تانية يللي ما بتكون كتير آمنة. والوجع، يعني، في كتير قليل العالم، انو هي وعم تاخد الحب تاخد مسكنات وهيك، وماحدا بيقلهن انو مثلا انو ياخدو مسكنات قبل ما ياخدو حبوب الإجهاض بيعمل فرق كتير كبير، كتير من دراسات فرجت إنو إذا أخدوا الحبوب مش ال- ولا مرة الPonstan  ولا مرة الspasphon هدولي لأنو بيوقفو التقلصات، وبيمنعو الإجهاض، لأ قصدي المسكنات اللي بيشتغلوا عنجد على أعصاب الوجع يلي هي الibuprofen والpanadol وهدول اللي هني بيخففو الوجع أكتر، الibuprofen أكتر من الpanadol بكتير، الpanadol يعني ما حدا بيبلش فيه بفتكر، بس بأي حال مهم بفتكز انو هيدول الأشياء تتوضح وإنو نعرف انو دايما أكيد انو يكون الخص يللي عم تنزل بالبيت يكون في حدا حدها كمان، يعني إذا قدرت توثق بحدا أو إنو تحكي مع حدا، إنو ما تكون لحالها بالموضوع، ومع إنو في كتير عالم بتخوّف على موضوع النزيف أو العوارض الجانبية ففي كتير نسوان بتحس انو انو إذا صار معها أي عوارض جانبية لازم تركض على غرفة طوارئ بس هي عادي الMisoprostol بيعمل كتير عوارض جانبية، مثل الاسهال، لعية النفس، الاستفراغ، البردية انو بترتفع الحرارة شوي، انو هدول بس ليكونو عم يتاخدو الأدوية انو مش بتضلها هيكي على خمس ست أيام. وبفتكر بس العالم تعرف انو هيدولي العوارض الجانبية معقولة تصير، هيدا الشيء بقلل من الخوف، وكمان بيشيل من هيدي الخرافة انو هو شي كتير مؤذي ومخيف وهيك. فبفتكر هدول هني عن الوسائل الطبية. هلق في الإبرة ما كتير حكينا فيها، بس ما كتير تستخدم بقا، هي كانت تنعطى أكتر بحال كان في حمل خارج الرحم، فبتنعطى هيدي الإبرة، نفس الإبر اللي يستخدموا أحيانا بالعلاجات ضد الأمراض السرطانية، هي نفسها اسمها Methotrexate، وهي بتستخدم كرمال تصغّر الورم بالسرطان وبتصغّر هوني الخلايا يللي بعدن عم يتكاثروا لأنو بيكونو بأوّل الحمل فيا تستخدم يعني إذا كان الحمل خارج الرحم. بس انو هيدا فيه يبين كمان على صورة، انو إذا الحمل خارج الرحم انو إذا هو بداخله، ما كتير اله عازة ال Methotrexate، الCytotec بيضلو أنشط. أي ما بعرف إذا بعد في شي، في شي بعد عن الإجهاض ما قلناه؟

نانسي: حاسة كتير غطينا أمور، ويمكن بدنا جزء ثاني، بعد فترة

هيفا: حلو

نانسي: كتير انبسطت بالمعلومات وتعلمت قصص جديدة، وبتمنا يكون استفادوا المستمعين من أمور معينة، وأكيد حنكون عم نرفق بعض المصادر، اللي منعتمد عليها بالبودكاست تبعنا تحت، اذا حبيتو المعلومات ولقيتو إنو مفيدة لإلكن بتمنا تشاركوا مع الأصدقاء والرفاق، وشكرا على إستماعكن على بودكاست فاصلة وبتمنا انو نلاقيكن بالحلقة القادمة. كان معكن نانسي واليسا وهيفا.