نص البودكاست:

عايدة: عملتو سكس مش محمي بآخر كم يوم؟

ليلى: (ضحك) يا الله! شو يعني، شو قصدك مش محمي مثلاً؟

عايدة: عملتو سكس بدون إستخدام أي موانع حمل؟ (ضحك)

ليلى: لا بس انا مرتاحة إنو نكمل هيك عادي، بس إنه شو قصدك؟

عايدة: فينا نرجع نبلش

ليلى: لا ما ضروري نرجع نبلش، بس شو قصدك بسكس مش محمي؟

عايدة: مش حأعمل أديتينغ لهيدا الشي (ضحك)

ليلى: لا ما بفتكر، بفتكر إنه هيدا هو السؤال، شو معناة سكس مش محمي؟

عايدة: لما نقول سكس مش محمي بكون قصدنا سكس،  حسب كمان شو عم منفكر إنو بدنا نحمي. إذا sex مش محمي لأنو ما بدا حدا تحبل فهو سكس ما عم بتستخدم اي مانع حمل من خلاله. إذا سكس مش محمي من ناحية الإلتهابات المنقولة جنسياً، فممكن تكون ما عم بتستخدم كوندم بشكل عام، واقي خارجي أو داخلي.

ليلى: أو مثلاً سكس يمكن غير محمي من العوارض العاطفية أو من الأثار الجانبية العاطفية. هيدي كيف شو بنستخدمي ضدن هيدول؟ تيندر مثلاً؟ (ضحك)

عايدة: تيندر صح

ليلى: تمام، يمكن، ليه عم بتسألي؟

عايدة: أنا عم بسأل لأنه هيك حابّة إحكي عن حلّ من الحلول يلي منستخدمو مش للعوارض العاطفية أو الإلتهابات المنقولة جنسياً، منستخدمو إذا خايفين إنو نحبل.

ليلى: أوكي، فنحنا عم منحكي عن وسائل منع حمل إذا ما كنتي عم بتستخدمي وسيلة قبل الممارسة الجنسية، إنو مثلاً شي منو مترّم، سكس صار هيك عن فجأة يعني ما كنت أنا متوقعة يكون في سكس.

عايدة: أو حتى متوقعين، و حميِت هيك القصة و حبيتو إنو ما تستخدمو واقي.

ليلى: او مثلاً كان عم بيستخدم، بعدين صار في ضياع، بعدين إنخزأ، بعدين قلنا يي ما في غيرو، بعدين قلنا خلص بدونو لهالواقي، بعدين...

عايدة: أو علق جوا و ما قدرنا نطلعو

ليلى: يي (ضحك) أوكي علق إي مثلاً. أو فينا نقول في إحتمالات تانية، مثلاً كنت عم بعوز وسيلة منع حمل بس كمان بلشت عم باخد مضادات حيوية أو antibiotics من الطراز التقيل، لأن هو بخفف كمان من فعالية وسائل منع الحمل. في antibiotics بالأخص يستخدمو للسلّ متل ال Rifampin وهيدول، هيدول بيلغو فعاليّة وسائل منع الحمل بشكل كامل مش بس بخففو الفعاليّة.

عايدة: أو كنتي عم بتاخدي الحَبْ و نسيتي حبّة أو حبتين و عملتي سكس وقتها

ليلى: أو

عايدة: (ضحك) كل الخيارات

ليلى: صح إيه، أو مثلاً ما كنتي عارفة حترجعي تشوفي الاكس و إنو يي شو عم بتعملو هون؟ كيف الحياة؟ كيفك إنت؟

ليلى، عايدة: ملا إنت (ضحك)

عايدة: أو في يكون شي مآساوي أكتر. إنو حدا تعرّض لإعتداء أو إغتصاب

ليلى: صح، هيدا مش سكس هون عم منحكي عن إعتداء. فهيدول الإشيا يلي معقول تكون الوضعية يلي بتخوّل حدا يستخدم وسائل منع حمل طارئة. فخلينا نحكي فيهن بما إنو هلأ حكينا بكل السيناريوهات، و مأكدّة كمان إنو في سيناريوهات تانية بس ما عم منقدر نفكر فيهن هلأ. في كزا شغلة في الشخص مثلاً يستخدمن. في أدوية، صح؟ و في إشيا أكتر متل اللولب مثلاً، لهي وسيلة منع حمل يلي تستخدم على وقت طويل يلي منها هورمونية متل اللولب. فيمكن بس تإشرح للأشخاص يلي عم بيسمعونا. آه انا ليلى نسيت قلكن اسمي (ضحك) أنا ليلى، شو إسمك؟

عايدة: و أنا عايدة و نحنا عم منحكيكن من بودكاست فاصله من مشروع الألف.

ليلى: تنرجع للموضوع، فاللولب كيف شكله؟ في نوعين لولب، و هنّي يستخدمو كوسيلة منع حمل دائمة، و أكيد إنو بيتغيرو، اللولب النحاسي في يتغيّر كل ١٠ سنين أو ٧ سنين حسب أي واحد انعاز. و اللولب الهورموني في يستخدم، الموجود، في تاع ال تلات سنين و في تاع الخمس سنين. و هيدول الوسائل بالإجمال يعني، بينعرضو كوسائل منع حمل طويلة الآمد بس كمان فيين يستخدمو كشي لوضع طارئ متل الأوضاع لكنا عم منحكي عنهن. و لازم ليزبطو، يعني بعد الممارسة الجنسية لما كانت محمية من الحمل فينا نستخدمن بأول أسبوع بعد الممارسة. إذا منحط اللولب بأول أسبوع  بيلغي إحتمال حدوث حمل و هي متل إذا بدكن ٢ ب ١، بمعنى إنو كمان بضلو من بعدها، ففيها تخلي من بعدها لفترة زمنية  أطول بحال، كرمال الأخطاء الجايي (ضحك) أكيد ما قصدي أخطاء لان عادي بتصير. إيه ففيهن ينحطو بأول أسبوع. و في إشيا أقل، و ما ضروري يضلو على وقت طويل متل مثلاً الحبوب. يمكن فيكي تخبرينا عنن ليلى؟

عايدة: إسمي عايدة

ليلى: إيه أنا قلت عايدة

عايدة: آه سمعت ليلى

ليلى: آه سوري أحياناً بقول إسمي بلا ما حسسس، بحبو كتير لإسمي (ضحك). إيه عايدة..

عايدة: ففي الحَبْ يلي عادةً بيتروّج إلو على إنو حَبْ ال 'مورنينغ أفتر بيل' أو الحَبْ يلي بتاخدي هيك تاني نهار من لما تعملي سكس، بس هيدي بس مجرّد ترويج للحَبْة، بس فيكي تاخديها أكيد مباشرةً بعد ما تعملي سكس و حسب نوع الحَبْ لعم بتستخدمي، فيكي تستخدمي أول ٣ إيام أو فيكي تستخدمي أول ٥ إيام. فهيدا الحَبْ هو مبني على الهورمونات 

ليلى: أكتر شي progesterone، مدعوم progesterone

عايدة: مدعوم

ليلى: (ضحك) إيه

عايدة: و بيشتغل عادةً على إنو يأجل الإباضة (ovulation) إذا الإباضة رح تصير بنفس النهار  أو قريباً بالكم يوم الجايين، أو إذا اورادي صايرة الإباضة بيمنع إنو يصير في تلقيح و يعلق البويضة الملقحة على حيط الرحم

ليلى: ويمكن بس هيك شوي، الإباضة هي بالإجمال بتصير مرّة بالدورة الشهرية بشكل عام، يعني هلأ أحياناً معقول تصير أكتر من مرّة أو بنفس فترة الإباضة بدل ما تطلع بويضة ١ معقول يطلعو ٢ فكمان هيدا الشي معقول يأثر. بس هيدي إمكانية ما بتصير بشكل عام. و كان بدي قول عن حبة اليوم التالي بفتكر إنو هيدا كتير، كيف بدي قول، يعتبر إنو السكس بس بصير بالليل و هيك و بالعتمة. فكرمال هيك، مثلاً إذا كان مورنينغ سكس ، بعني غود مورنينغ، صباح الخير، متل هيدول الصور يلي بتبعتلي ياهن تيتا عالواتساب (ضحك) يعني سكس إز صباح الخير، بهالحال فيك دغري صباح الخير و ضل مقلعة عالصيدلية (ضحك) هيك بقلو صباح الخير عاوزة حَبْ، مش يوم التالي، حَبْ الساعة التانية، أكيد بيطلعو فيكي بالورب شو قصدك؟ هون أنا بنصح المستمعات فيكن تلبسو محبس (ضحك) لأنو هنّي ما حيطلبو وراق زواج أو أي نوع من برهان أو أي نوع أو أي شي إنو إنتو بعلاقة 'شرعية' و أكيد إنو إذا إنتو بعلاقة شرعية مبروك و إنو فوتو و راسكن عالي، ما تستحو (ضحك) و أكيد ما تستحو إذا مش مجوزين عادي رواء. و إيه، هيدا الشي معقول يخفف من الدراما. في كتير نساء بتقلنا عالخط الساخن للجنسانية يلي رقمه 76680620 بيفتح كل يوم من ال٥ لل ١١، في واتساب إنايبلد. ففي كتير نسوان بتقلنا إنو الصيدلاني هيكي بصيرو يعطوهن، كيف؟ شو؟ إنو بصيرو بعيطو عليهم، مش بعيطو عليهم، هيكي بصيرو بيعطوهن درس أخلاق، أخلاقيات. بس بأي حال في كتير صيدليات عندن ياهن، فإذا ما عجبهن الوضع حملو حالكن و فلو (ضحك) أو فقعو مشكل كمان، و إذا فقعتو مشكل فتحو لايف و نحنا منعملكن شار (ضحك) أكيد. بس بايعدت شوي عن الموضوع. بعتذر

عايدة: ما بأثر، ما بأثر، بتفوتينا فوتات مهمة. (ضحك)

و طبعاً هون بس لزيد على يلي عم بتقولو ليلى، طبعاً عم منحكي عن السياق تبع لبنان، بلبنان الحَبْ موجود أوفر دا كاونتر أو موجود بدون وصفة، ففينا نعمل هيدي الرقصة مع الصيدلاني (ضحك)

ليلى: تانغو، تانغو الأمل (ضحك)

عايدة: بس ببلدان تانية بالمنطقة مثلاً بالإمارات ما في حَبْ اليوم التالي أو حَبْ الطارئ و بكتير بلدان تانية بحاجة لوصفة، بأميركا بعتقد بحاجة لوصفة من طبيب قبل ما يقدرو يحصلو على الحَبْ.

ليلى: كتير لوارا أميركا إيه؟ متراجعين (ضحك)

عايدة: عنجد بلد التقدم و الحضارة، أداء مش عاجبني (ضحك)

بس هون الحمدلله، بلبنان منقدر نوصل للحَبْ

ليلى: بلد الحبوب (ضحك)

عايدة: بلد الحريات، في هيك قصص بس أكيدة مش إحتراماً لحق المرأة لتوصل لهيدا، بس هي القصص فايتي ببعضها فما كتير لحقوا يحطو عراقيل قدام النساء بإنو توصل على الحَبْ من الصيدلاني

ليلى: و في كتير عالم ما بتعرف إنو في حبوب منع الحمل الطارئة و بحسوا إنو يي خلص لازم أنا أنطر لإرجع شوف إذا حترجع تجيني الدورة ولا لأ. فيمكن نحنا فكرنا نعمل هيدي الحلقة لنقول إنو هيدا الشي موجود و متوفر و منو غالي. يعني إذا منفكر مثلاً الحبوب منع الحمل الطارئة الموجودة بلبنان في كزا نوع مثلاً، ما قصدي أعمل دعاية لأي براند و يعني ما فارقة معي، بس هو أهم شي يكون في المكون Levonorgestrel بالحَبْ ففي نوع Purple Line، ومن زمان كان في Norlevo و هلق بفتكر شوي إنقطع و بطل كتير موجود بالسوق حقه ٢٠.٠٠٠ ليرة و في واحد تاني، نوع تاني إسمو Ella One بس هو ما بيشتغل بنفس الطريقة، هو ما فيو Levonorgestre بس بيستخدم بنفس الطريقة لهو بيتاخد دغري و بأول ٥ إيام فهو إلو مجال أكتر، يعني إذا وحدة ما كانت مأكّدة أو ما لحقت تشتري الحَبْ فيها تجيبو بعد ٤ إيام أو ٣ إيام و بتخفض نسبة حدوث الحمل. بس مع Levonorgestrel يلي هو الإسم الكيميائي، بس مش إسم البراند، يعني نوع الحَبْ بأكترية الحال لازم يستخدم بأول ٧٢ ساعة فبأول ٣ إيام، و تنيناتن بيشتغلو، يعني عندن فعاليّة عالية، و الفعالية بتزيد بس ليستخدمو بأسرع وقت ممكن. فمثلاً إذا قصة بعد ساعتين متل ما كنا عم منحكي، واو، توب، برافو، إذا بعد ٣ إيام عادي بتصير بس بتخف فعاليتها بس بضله أكيدة أحسن من إنو ما يستخدم. و هو في لل ٨٥٪ فعالية، فحتى لو إستخدم بأحسن وقت و بأسرع وقت ممكن بضل في نسبة ١٥٪ إنو يصير في حمل غير مرغوب فيه، و هيدا الشي سئيل أكيد لأنو بيجي فترة موقف هل أنا بخلي هيدا الحمل ولا لأ . هون برجع بدلكن ع بالحلقة لعنّا ياها قبل، قبل، قبل هالحلقة، عن الإجهاض إذا بدكن تعرفو أكتر عنّو، أو إذا أكيدة حدا قررت إنو لأ أنا يمكن كان يدي أخد أو أخدت الحَبْ المانع الطارئ بس هلق بما إنو لقيت حمل حابّة كمل في كمان تمام و ما بأثر الْحَبْ المانع الطارئ على الحمل أو على الجنين، فكمان لتطمنو إذا ما عمل شغلتو بوقتها معليش، ما معناتها إنو خبّص.

عايدة: و أكتر العالم بتخاف من العوارض لمّا نحكي عن وسيلة هورمونية، بس العوارض لممكن تشوفيها مع حَبْ المنع الحمل الطارئ لا تقارن بالوسائل الهورمونية، لأنو نحن عم مناخدها مرّة وحدة و حتى لو عم مناخدها كل شهر مرّة، هي بتضل كميّة من الهورمونات عم بتفوت بالجسم لا تقارن بإنو تكوني عم بتاخدي حبة كل يوم، فما كتير مفروض يكون في خوف حواليها. و العالم كمان بتخاف من شغلة تانية، إنو لأنو عم منفوّت هورمونات بالجسم ممكن تأثر على الدورة لحتجينا بعد، الدورة الجاي يعني، بس مش بطريقة لا تصلّح أو بطريقة سيئة يعني، بس ممكن تقرّب الدورة أسبوع و ممكن تبعّد الدورة أسبوع أو كم يوم، مش بالضرورة أسبوع. بس هيدا الشي بيقلقنا كتير لمّا نكون ناطرين إنو تجينا الدورة لأنو منكون خايفين إنو نكون حامل و إذا تأخرت الدورة شوي منقول إنو خلص ما مش حال الحَبْ، فبس هيك كنوع من التطمين إنو أغلب الوقت بكون بسبب إنو الحَبْ أخرت الدورة. لهيك مهم بعد ما ناخد الحبة ننطر أو نتوقع إنو ممكن يكون في لخبطة بالدورة لجايتنا و إذا تأخرت شوي ما كتير نخاف، و ننطرلنا كم يوم قبل ما نعمل فحص الحمل.

ليلى:  إيه، و إذا بوقتها كان بعده، يعني إذا مرق أسبوعين على أيمتى أخدتي الحَبْ، أو مرق فترة و فاتتك الدورة و أخدتي فحص بول تحليل للحمل و طلع إنو سلبي، بأكترية الحال هو فعلاً سلبي، يعني فيكي ترجعي تجربي بعد يومين تلاتة إذا طلع سلبي يعني خلص هيي بس مأخرّة الدورة. هيدا أكيدة علماً إنو يمكن ما كان في ممارسات جنسية تانية بين وقت ماكنتي آخدة الحَبْ و وقت بترجعي بتعملي الفحص لأنو كل ممارسة جنسية مبدئياً في إحتمال إنو يصير في حمل من وراها. بس الشي المهم نقولو هو مع وسائل منع الحمل الطارئة الهورمونية الحَبْ يعني مش اللولب و هيك، القصة يلي مهم إنو نخليها ببالنا هو إنو في عالم ما بتعرف تعِّد الدورة، يمكن لأنو دورتها ملخبطة، منها نظامية، فبهيدا الحال يفضّل إنو تستخدم بس ليكون في علاقة أو ممارسة جنسية يلي ما تطمنّا من بعدها. بس كمان للأشخاص يلّي بتعدّ إيام الدورة و دورتها عنجد نظامية على فترة طويلة، فيهن هنّي كمان نوعاً ما يقدروا يحددو نهار الإباضة لأنو هو فعلياً الإباضة بتصير مرة بالدورة بس و هيي دايماً بتكون أسبوعين قبل الدورة الجاي، فإذا إنتي منِّك عارفة أيمتى دورتك الجاي ما فيكي تعرفي أيمتى حيصير في إباضة لأنو ما فيكي تخمني أيمتى إذا منِّك مأكدة أيمتى بترجع بتجيكي. فإذا ما عارفين أيمتى بترجع بتجيني و كتير بتلعب الدورة، دايماً بفضّل إنك تاخدي وسيلة منع الحمل الطارئة أكيد. هلق كمان يفضّل إنو  إذا شي، و فينا نحكي أكتر بحلقة تانية عن وسائل منع الحمل المستمرة أكتر، إذا هيدول ما ملائمينك و منك مرتحتيلن و منك جاهزة لتعملي نوع من ال commitment أو إلتزام لإلهن، و عادي بتصير. في كتير عالم بتاخدهن كتير وقي ليلاقو الوسيلة يلي بفضلوها، و في عالم يمكن ما بلاقو وسيلة بفضلوها بس إذا ما منعرف أيمتى بدها ترجع تجينا وهيك، عوزيهن. و في كتير أشخاص و بالأخّص بالنظام الصحي أو دكاترة و ممرضات و أشخاص لبيشتغلو كمان بالصحة الجنسية يلي دايماً بقولو إنو ما فيكي تستخدمي أو يكون في إفراط إستخدام وسائل منع الحمل الطارئة أو الحبوب منع الحمل الطارئة و هيدا الشي خُرافي، خُرافي مليونين بالميّة و فيني إبعتلكن مليونين مقال أكاديمي، طبّي، يلي ببرهنو إنو لأ فيهن يستخدمو عدّة مرّات بالأخّص تعول ال Levonorgestrel لِكنّا عم منحكي عنه، تبع التلات إيام. هلق التاني Ella One يفضّل يستخدم مرّة بالدورة. بس إذا مثلاً إستخدمنا مرّة بالدورة و تاني مرّة رجع صار في ممارسة جنسية بعد كزا يوم و قلنا يي رجعت صارت كيف هيك، فيكي ترجعي تاخدي Levonorgestrel كمان فعّال و قوي و بيمشي حاله كمان. هلق إذا رحنا عالصيدلية و عملنا التانغو و رقصنا وهيك و ما مشي الحال و قال ما عندي لا هيدا ولا هيدا أو إذا نحنا ببلاد وين مافي وسائل منع الحمل الطارئة الحبوب، في أنواع حبوب منع الحمل الدايمة يلي فيهن يستخدمو بطريقة معينة ليصيرو emergency contraception يلي هيي منع الحمل الطارئ. بلبنان، حأعطي مثل لبنان لأن ما بعرف شوفي باراة لبنان، علقانة هون (ضحك). في مثلاً ال Microgynon يلي هو حَبْ كمان بِسَّمو حَبْ الرضاعة يلي هو بيستخدم بس المرا تكون عم بترضع لأنه ما في Estrogene عالي و في Progesterone عالي، فإذا بيتّاخد بكمية أكبر، يعني هو المفروض يتاخد حبة كل يوم عادي متل أي حبة منع حمل. إذا بعد الممارسة يلي مش مطمنين منها ما لقينا لا Levonorgestrel ولا Ella One فينا نروح عالصيدلية و نقول: عندك Microgynon؟ هيك بقولو برافو عم بتاخدي الشي الطويل الآمد، عم بتاخدي حبة كل يوم عم بتهتمي بحالك، هني مبسوطين بحالهن بكونو، بس إنتي بتكوني عارفة إنه حتاخدي أربع حبات دغري و بعد ١٢ ساعة بترجعي بتاخدي أربعة و الكمية بكاملها على هالنهار هي كأن أخدتي حبة وحدة من Levonorgestrel. في عوارض جانبية يلي هي في إزعاج، معقول يكون في لعيان نفس، في عالم بتحس بدوخة بس بتضاين هيدا النهار و معقولة كمان متل ما كانت عم بتقول عايدة إنه تأخرلك الدورة الجاي. و ال Microgynon ما حقه شي ٥٠٠٠ أو ٣٠٠٠، في عالم بتعوزو بشكل عام لأنه بتلاقي إنه ال Ella One  يلي ما قلتلكن إنه حقه شي ٥٠،٠٠٠ و ما بعرف هلأ مع الأزمة الإقتصادية وين حيصير إذا بكون مدعوم أو بتصيري تدفعي بالتقسيط، بس ال Microgynon أرخص و في كتير عالم بتفضل تستخدمه.

عايدة: وفي خرافة تانية كمان بتنقال عن وسائل منع الحمل الطارئة، لهي إنه كتير عالم بفكرو إنه نحن عم منحكي عن الإجهاض.

ليلى: يي! (ضحك) شو هيدا! Emergency button abortion

عايدة: لأنو خلص أي شي بتقولي إنو عم بتعملي شي بعد ما عملتي السكس خلص صار في conception و صار في تلقيح وفي حياة وكل هالقصص.

ليلى: مان شو هيدا!

عايدة: كتير مهم نضوي إنه لأ هو منه إجهاض و هو العملية لبتصير بالجسم مختلفة كلياً عن أي شي إلو علاقة بالإجهاض لأنه نحن عم منمنع الحمل يصير من الأساس فلهيك إذا في أي ملابسات أو أفكار أو تخوف من إنو تكوني عم بتقومي بشي مش بالضرورة بتحبي تقومي فيه، أو إنو حدا يقلك إنو لأ ما تستخدمي هالشي عم بتعملي شي حرام أو واتفر، أي سبب، لازم نفرق بين التنين وبالنهاية التنين حق.

ليلى: هني العالم بقولو كل شي إجهاض، ما بحب الولاد هيدا إجهاض (ضحك)

عايدة: إجهاض للفكرة (ضحك)

ليلى: أجهض الفكرة. بس لا أكيد ما خصهن ببعض، يعني في كتير عالم بفكرو هيك ببلاد أكتر يلي بكون عندن قوانين، أو ببلاد كاثولوكية مثلاً بأميركا اللاتينية بقولو إنو وسائل منع الحمل الطارئة هي وسائل إجهاض بس أبداً مش مظبوط. مثلاً وسيلة إجهاض هو بس لما الدركي بكبو مسيل للدموع على المتظاهرين، هيدول بسببو إجهاض و لكن الإجهاض مجرّم بلبنان.

عايدة: حسب مين عم بيعملو، الدولة، البوليس...

ليلى: صح، صح، إيه، مثلاً أنا بشوف مسيل الدموع اكتر وسيلة إجهاض من أكيدة وسائل منع الحمل الطارئة يلي هني بس بيمنعو إنو تلقيح البويضة أو إنو غرسها بحيط الرحم أو بأخرو فترة الإباضة، يلي هون بذكرني بقصة كتير مهمة لقلكن ياها، إذا أخدتوها، أخدتو وسائل منع الحمل الطارئة ما تقولو إنو يي خلص مشي الحال هلق يلا بعد تلات إيام فينا نرجع نعمل سكس لأنه أخدت الحَبْ الطارئ قبل. لأ! لأنه معقول تكون أجلتلك الإباضة و ترجعي تلاقي حالك بنفس المعمعة بعدين، فبتكوني أجلتيها لتلات إيام لترجعي تلقطيها بالوضع الصعب و تلاقي حالك حامل بآخر الشهر، فبدك يا ترجعو تستخدمو واقي خارجي يلي كمان يسمى واقي الذكري أحياناً، أو تعملو إشيا تانية بتسلي يلي معقول ما تأدي لحمل.

عايدة: في كتير قصص بتسلي غير

ليلى: و هيدي حلقة تانية من فاصله بتكون، بس بفتكر لهلق غطينا موضوع وسائل منع الحمل الطارئة، و منتمنى إنكن تضلكن على الإستماع على الإشيا التانية.

عايدة: و إذا عندكن أي أسئلة كمان فيكن تحكونا، فيكن تعملو تعليق أو فيكن تسألو مرشدات الخط الساخن للجنسانية.

ليلى: على ٧٦٦٨٠٦٢٠ بين ال ٥ و ال ١١ كل يوم واتساب إنايبلد. كان معكن عايدة و ليلى، سلامات.