للاستماع للبودكاست، الرجاء النقر هنا.

---

عايدة: مرحبا! معكن عايدة وليلى من بودكاست فاصلة من مشروع الألف، واليوم حبينا نحكيكن عن ما يعرف ب "القذف خارج المهبل" أو "القذف الخارجي"

ليلى: خلينا بال "خارجي" أزبط

عايدة: الخارجي. الإنسحاب التكتيكي قبل ما يصير في قذف بشكل عام، واللي هي وسيلة حمل معتمدة عالميا، حبينا نحكي عنها شوي، في شوية خرافات منتشرة عنها، فهل فعلا هي وسيلة ما فينا نعتمد عليها أو وسيلة فعاليتها مش كتير عالية؟ كيف ممكن نعلّي الفعالية كمان بنفس الوقت وليش أساساً الاشخاص ممكن يستخدموها وهو في وسائل منع حمل موجودة صنعناها كبشر متطورة اكترمن هالوسيلة؟

ليلى: يعني ما بتعتبري انو صنعنا القذف الخارجي كبشر؟

عايدة: هيدي متل إنو اكتشفنا النار او شي

ليلى: اكتشفنا البارود، بالغلط

ليلى: أوبس! (ييي فينا نسمي "أوبس")

عايدة: قولك هيك اكتشفوا القذف الخارجي؟

ليلى: انو غلطة؟ انو حدا انسحب؟ حدا ضلّه يخلص برّا بالغلط قام ما كانت عم تحبل متل هيدا ب Bridgerton (هيدا شوي spoiler بس تحضريه بتشوفي).

لا بس خلينا قبل نحكي مع المستمعات والمستمعين يمكن ما بيعرفوا شو هو القذف الخارجي. بتحبي عايدة تصوريلنا ياها؟

عايدة: أكيد! انا كتير بحب صور العملية. يعني هو الوسيلة لما بيكون عنا عضو.. شو بيقولوله؟

ليلى: بدك تقولي عضو ذكري بدون ما تقولي ذكري كرمال يكون عضو gender neutral

عايدة: تناسلي

ليلى: ما ضروري يكون تناسلي لأنو في يكون للذة الجنسية

عايدة: شو بيقولوله! عضو ذكري، ما إلو إسم تاني!

ليلى: عضو نيك، عضو ايلاجي، عضو ..

عايدة: بيعمل قذف للمني

ليلى: عضو قاذف

عايدة: وين النسويات، كل شي بدن يكون gender neutral

ليلى: عنجد! "حتى العضو بدن ياخدو مني"!

عايدة: فبس يكون في عنا عضو بسموه عادة ذكري بس هو في يكون عند اي حدا بيعمل قذف فعلياً بس نكون عم نعمل جنس، عم نعمل ادخال وما بدنا نحبل..

ليلى: بتلبطي شو لبطة!!

عايدة: طلاع من هون، روح انقلع!

ليلى: ايه ما ضروري هو في ينسحب بكل تصميم وفيكي تدفشيه

عايدة: صح! فإذا ما بدك تحبلي وما عم تستخدموا وسيلة معينة.. ما في condom، هيك قصص، في هيدي الطريقة المتعارف عليها، بصير القذف خارج المهبل وهيك ساعتها منختصر وما منضطر ناخد حبة بعدها او نستعمل اي وسيلة تانية في حال تمّت بالطريقة الصح

ليلى: وهي بالاجمال الفكرة من وراها انو اذا السائل المنوي ما فات عالمهبل ما بيرجع بيطلع على بيت الرحم وما بيوصل عالمبيض ويلقح بويضة فهي الفكرة انو المفروض كل السائل المنوي يخلص برا بس هاي ما دايماً بتصير لانو في سائل ما قبل القذف كمان يسمى ب precum، بيكونوا هيدول النقط، happy droplets وهيدول صعبة انو الواحد يشيلن نقطة نقطة، فهيدول خلص تحصيل حاصل وخاصة اذا كان الشخص صرلو زمان او إلن زمان مش عاملين قذف بيكون في حيوانات منوية عايشة فيهن كمان فكرمال هيك دايما بينقال انو منها كتير وسيلة فعالة وفعليا انو اكيد فيها نسبة فشل. منيحة، بس احيانا يمكن الطريقة اللي الجهاز الطبي بصورلنا ياها بتكون كتير فاشلة بس حنحكي شوي اكتر بهيدول التفاصيل، يعني ما بدنا نقولن كلن سوا بس هو كرمال هيك بيعملو سحب او بيصير قذف خارجي، منّو عن تسلاية بفتكر.

عايدة: غير السبب اللي قلتيه عن مني قبل القذف، كمان في سبب تاني اللي هو كتير اشخاص بيقولو انو يمكن الشخص اللي عم يعمل الادخال ما يكون عم يقدر يتحكم بحاله انو يعمل هالانسحاب التكتيكي قبل ما يصير في قذف فإذا الأشخاص ما كتير بيقدروا كتير يتحكموا بحالن وقت يكونوا عم يصيرفي عندن الرعشة الجنسية يمكن يكون صعب إنو يطلعوا حالن لبرّا

ليلى: ضهار لبرّا!

عايدة: يمكن يكونوا كتير محمسين يعني ما يتحكموا بحالن

ليلى: او ينقزوا

عايدة: في أحيانا أشخاص بتعملها قصدا بتقلك انو رح تطلع قبل ما تعمل قذف بتيجي بعدين بتقلك يي ما قدرت اتحكم بحالي

ليلى: لانو كتير بتنزع اللذة الجنسية وهيك. هلق هي فيها شوية ازعاج اكيد منو شي حلو بس بتعرفوا كمان شو ما حلو؟ انو حدا تضطر تعمل اجهاض لانك حمار ما بتعرف تطلع بالوقت المزبوط ومش بس ما بتعرف، بتصر انو لا هيدا بيصير نوع من العنف نحنا منعتبرو انو حدا بيكون عارف بالاخر الشخص اللي مضطرة هي تتعامل مع كل شي هي حتكون الشخص اللي بيحبل فاذا حدا بيعمل هيك انو بس كرمال هالكم لحظة اللذة بس انو عارفين انو المسؤولية حتوقع عليها، ومش بس المسؤولية، حتى اذا بدن يتشاركوا المسؤولية وهيك بالاخر حتى لو ساعدها بانو تحصل على وسيلة اجهاض او انو يخلوا الحمل كمان فبأي حال الوجع حيكون من دربها مش من دربه. فاذا عارف حالك مش قدها، ع قولة عايدة "جيب ال condom" "حط ال condom"

عايدة: هو هلق صعبة لانو صار ال condom كتير غالي يعني منفكر..

ليلى: في محلات بيوزعوهن ببلاش وكمان في condoms مش كتير غاليين، ما ضروري يكون signer، في يكون عادي بس بعدو احسن من قلة قدرتك انو تخلص برا مثلا

عايدة: طب اذا هلقد في احتمال انو ما تزبط لنقول انو متل ما يروج عادة، ليش ممكن اشخاص يلجأوا لهاي الطريقة؟

ليلى: لانو في كتير وسائل منع الحمل الحديثة او اللي بيكون يا ال condom يا لوسائل الهورمونية يا اللولب هيدول الوسائل في كتير نساء بتعمل عوارض جانبية عليهن او بتكون مجربتهن وفشلوا معها او بسببوا اوجاع، هول عوارض جانبية بالاجمال، او غاليين او في كتير أشخاص عم ياخدو رياحة بين وسيلة ووسيلة فبيقولوا بس لهالشهر، مش بس هني بيكونوا عم ياخدو رياحة، في كتير دكاترة بيقولوا "هلق شلتلك اللولب، صرلك ست سنين ليه ما بتجربوا الطبيعي؟" هني بسموها، أو الواسطة (هاي منرجع منحكي فيها بعدين)، انو يخلص برا بس انو بكون صرلن زمان ما عاملينها او ما معودين عليها خاصة اذا كان في وسائل تانية كانوا يعوزوها يعني معودين انو القذف يكون داخل المهبل ف هيك. وبفتكر في كتير دكاترة بروجوا كل الوسائل التانية لانو في كتير عيب ونوع من وصمة وكيف بدي قول.. حكم مسبق عالنساء اللي بتحبل وما بيكونوا عم يستخدموا وسائل منع حمل حديثة.

حتى اسمها "وسائل منع حمل حديثة" أو "modern contraceptive" انو هي كانو في اشخاص متحضرين بيستخدموا هالطرق وفي البجم اللي بيستخدموا الطرق التانية بس هو فعليا الكل بيستخدم القذف الخارجي كوسيلة لانو في خوف من وسيلة ما بيعرفوا عنها ما بيعرفوا شو حتعمل بأجسامن وفي كتير عن شو بيعملوا. فبما إنو مافي اي نوع من ثقافة جنسية او علم عن الموضوع، فأكيد العالم بدها تخاف وخاصة الاشخاص اللي بتكون عم بتمارس الجنس خارج الزواج صعب احيانا انو يحصلوا عوسائل منع الحمل لانو بينسألوا كتير اسألة: مزوجة او مش مزوجة فبيضطروا يستخدموا الاشيا اللي فيهن يجيبوها من الصيدليات يمكن منها مناسبة لالهن ويمكن ما بحسوا فيهن يتابعوا مع حكيم او دكتورة على وسيلة يمكن اثبت او بيخافوا مثلا. وأضرب، في دكاترة بصيروا يقولولن ليه بدك تحطي وسيلة طويلة حرام بعدك مش مزوجة بكرا بدك تتجوزي وتجيبي ولاد فبتصير هي الوسيلة الوحيدة بدون ما يضطروا يتعاملو مع جهاز طبي.

عايدة: الاسباب اللي عم تحكي عنها كمان كتير متناسبة مع الاسباب اللي بالدراسة اللي كنت عم خبرك عنها قبل ال podcast اللي كانت عم تعمل متل استقصاء للأراء حول القذف خارج المهبل بين ازواج، نساء ورجال بلبنان من كم سنة وانا صدمني شخصيا لانو كنت فكّر إنو هو خيار عادة يؤخذ من الرجال انصدمت انو بالعكس هني النساء بهالدراسة كانوا عم بطالبوا انو القذف الخارجي هو الوسيلة بسبب القصص اللي قلتيها انو هني حيكونوا عم يتحملو مسؤولية كل العوارض الجانبية اللي ممكن تصير مع انو في هيدي المخاطرة. طبعا بالنهاية عالحالتين كنت عم تستخدم طريقة القذف خارج المهبل او لأ انو في خطر تبع انو تحبل وتتحمل كمان نتيجة هالشي بس هيك دايما منحكي عن وسائل منع الحمل انو دايما على عاتق الاشخاص يللي بيحبلوا وبالتالي هيدي يمكن نوع من تمرير المسؤولية للشخص التاني انو في عليك هالمهمة.

فإذا بدنا نفكر، كنا عم نحكي، انو الجهاز الطبي كتير بيستخف بهاي الوسيلة وبيتعامل معها انو وسيلة كتير بدائية وانها منها حديثة كفاية او فعالة كفاية فبعتقد اذا منتطلع عالارقام كتير في ارقام بتدل انو اذا مننا مأكدين انو الاشخاص عم يستخدموا هالوسيلة بطريقة صحيحة 100% ممكن يوصل عدد فشل هالوسيلة ل 22% تقريبا بس اذا كانوا عم يستخدموها بطريقة فعالة ممكن توصل النسبة ل 4%، نسبة الفشل يعني. فنسبة النجاح أعلى بكتير من النسبة اللي عادة يروج لإلها على انو هي نسبة فعالية هالوسيلة

ليلى: هاي النسبة اذا بدكن تفكروا فيها هي انو من 100 مرا عم بتمارس الجنس بشكل عادي، انو نظامي، مش مرة كل 5 اشهر وانو اكترية الحال بيكونوا هيدول الارقام كمان بينعدوا مع اشخاص مجوزين ف من هال 100 شخص كنتي عم تقولي، 22 منهن بالسنة حيحبلوا عالاكيد مرة وهيدول الارقام بتنحسب بالسنة، سنويا فإيه اكيد مش لذيذ انو 22% او 25 % من النساء  بالسنة في احتمال انو يحبلوا لانو فيا تكون كذا مرة ما ضروري تكون مرة وهيدا الشي كتير مزعج وهيدا الرقم لوسائل منع الحمل هو رقم كتير عالي خاصة انو منعرف انو الوسائل الهرمونية يعني 100% اذا كان استخدامهن مثالي بس الاستخدام المثالي للقذف الخارجي هو 4% يللي هو كتير منيح بس المشكلة هي انو كتير خص الشريك، الشخص التاني. يعني هيدي المهمة مهمة اذا بدك، خاصة انو كمان في ديناميكيات قوى وعدم توازن قوى بسبب النظام الابوي بين الرجال والمرا وخاصة بالزواج ومؤسسة الزواج صعبة بيضغطوا على النساء تجيب ولاد وفيكتير اشيا بدون ما نكون عم نحكي اذا في عنف او اتكالية مادية .. يعني كل هالاشيا ما عم نحكي فيهن وحتى هيدول الارقام احينا بتكون هيك كتير مجردة من الوقائع السياسية اللي منعرف بتصير بس فعليا نحنا بس نكون عم نحكي عالخط الساخن للجنسانية مع اشخاص مجربين كتير وسائل او بدن يعرفوا "كيف فيني حسّن وسيلة القذف الخارجي مع شريكي؟" هو كتير بيصير موضوع التواصل مع هيدول الاشخاص او الثقة، قديش هني متواطئين مع بعض يعني كتير مهمة.

عايدة: متواطئين هيك بتخليها شوي سلبية

ليلى: دايما بتقوليلي هيك بس انا بحس التواطؤ شي حلو انو منكون عم نتواطأ على انو ما نأجهض بعدين، كيف فينا ما نكون عنا حمل غير مرغوب في يعني، انو نكون على نفس الصفحة انو تنيناتنا بدنا نفس الشي ف هيك ما حدا بيحس انو غلطوا اكتر من غيرن، ما منعرف شو بيصير باللحظة يمكن حدا يغلط اكتر من التاني اكيد بس انو ايه عالقليلة انو هو موضوع التواصل والثقة كتير مهمة.

عايدة: بعتقد كتير من الاشخاص كمان اللي بيستخدموا هيدي الوسيلة باعتبارها وسيلة طبيعية بكونوا عم يستخدموها بالتزامن مع وسائل تانية طبيعية يعني ممكن يكونوا عم يستخدموا وسيلة ال calendar او الرزنامة، العدّ. يعني يكونوا عم بتابعوا ايمتى بتكون فترة الخصوبة عالية ايمتى بتكون واطية وبالتالي بصيروا عم بمارسوا هالطريقة اللي هي اقل فعالية من غير طرق بالوقت اللي بكونوا فيه اكتر امان من ايام تانية او عم بقيسوا حرارتهن او عم بتابعوا الافرازات تبعيتهن فبعتقد كمان منشجع على هيدا الشي خاصة وسيلة العدّ لانو هيك منكون عم نزيد فرصنا لانو منها وسيلة بتطلب كتير مجهود اذا كنا عم نستخدم الرزنامة تبعنا او منزّل شي application عالتلفون منعد فيا او منحط ايام الدورة تبعتنا كمان بساعدنا نكون حاسين بامان اكتر او ارتياح اكتر باستخدام الوسيلة. بس ايه بشكل عام هو كل المطلوب انو يكون الشخص عم يتحكم بحالو ونعود بعض ع هيدا الموضوع ونكون عم نتواصل مع بعض متل ما كنتي عم تقولي ليلى خلال الجنس مش انو يي ما فيي قول شي هلق لانو رح خرب ال mood. انو عادي نتحدث لانو رح يرجع علينا الموضوع

ليلى:القذف الخارجي ما ضروري يرجع كليّا علينا! بوافقك عايدة بس كمان بدي زيد انو طريقة العد كتير مفيدة لانو اكترية الاوقات بيكون في 10 ايام بيكون فيهن نسبة حدوث حمل. ف بهيدول ال 10 ايام مثلا في يستخدم الواقي الخارجي او ال condom واذا صار اي حادثة مع ال condom: انكسر، انخزق، زحط، مات، انتحر... اذا صار شي مع الواقي هون بتستخدم وسيلة الحَب المانع الطارىء

عايدة: كنا عملنا عنها بودكاست

ليلى: ايه كنت رح قول فيكن تسمعوها يمكن من شي ست حلقات. فإيه، في يستخدم الواقي واذا ما مشي حالو في يستخدم وسيلة الحب الطارىء وكمان ما ضروري يكون في ممارسة ادخالية بهال 10 ايام في كتير عالم بتفكر بوسائل منع الحمل ك بس اشيا بتنحط كرمال بس لينحط ل ما يصير في حمل! انو في كمان الجنس الفموي، في الجنس الشرجي، في role plays أو لعب وفيكن بس تحضروا  porn وتلعبوا بانفسكن او انو فيكن تقرروا تاخدو رياحة وتحضروا اشيا عالتلفزيون

عايدة: فيكن تعملوا قصص بشكل عام

ليلى: فيكن تعملوا طبخة مجدرة واذا حميت القصة، يكون في واقي بالبيت وهيك

عايدة: حسيتها بالمدرسة، امتناع! في قصص تانية غير ال sex

ليلى: لأ انو في انواع sex تانية ما ضروري نعلق بنفس النوع انو في كتير اشيا بتسلي ما ضروري نضلنا على هالفكرة بس انو اكيد في اشيا بتستخدم باوقات الخصوبة

عايدة: وشو مشكلتك مع الواسط؟

ليلى: اه الكلمة؟ بتعرفي في blog كتبته عن هالكلمة بس ما انتشر بس قريبا ح نزله، ترقبوا قريبا! هي فيا مسبة العنوان، تتذكري؟ ايه ف .. ما بعرف اذا بدي قول لانو يمكن تنزل blog بعدين ف خليها ما بدي خبرهن

عايدة: ترقبوا

ليلى: ايه كلمات قوية حتنزل على موقعنا الالكتروني

عايدة: هي الواسطة للي ما بيعرف بيقولوا احيانا واسطة عن القذف الخارجي

ليلى: ايه بيسموها واسطة او حتّى "الطبيعي"، انو كيف طبيعي؟

عايدة: شو مشكلتنا مع الطبيعي؟

ليلى: انا كتير بكره الكلمة بس شكلو podcast تاني منرجع منحكي بالطبيعة.

ايه بس انو القذف الخارجي..

عايدة: شو منعطيه rating؟

ليلى: منعطيه 4% ل 22% فيو فشل وكتير اشيا بتفشل فعادي لازم كلنا نرتاح نفسيا مع الفشل، الواحد بيفشل بيرجع بيتعلم.

اذا صار معكن حمل غير مرغوب من ورا هال podcast نحنا منسحب المسؤولية: هذا ال podcast لا يتحمل المسؤولية ولا يروج لوسيلة القذف الخارجي كوسيلة معتمدة ولكن عم نقول انو العالم اللي بتعوزه وبتحس انو بترتاح اكتر مع هالطريقة انو اتطلعوا كيف فينا نحسنها كطريقة وانو الخلاصة: بيقولوا عنو هو اسوأ من ما هو، بس فعليا بالعلاقات السامة او علاقات منها منيحة بين الشريكين اكيد ما منحس هيدي وسيلة كتير بزبط لانو كتير صعب يكون مشاطرة او نقاش على استخدام وسائل منع الحمل وبهالحال في كتير نساء تمنع انو تستخدم وسائل منع حمل حديثة وبتنجبربوسيلة القذف الخارجي واحيانا انو يصير داخلي او خارجي ومايكون الها قول بشو بدو يصير ف هون مننصحك انو مثلا انو تستخدمي وسيلة منع حمل حديثة بالمخفي متل مثلا الابرة اللي بتضاين 3 اشهر او الحب، فيكي تاخدي حبة كل يوم الا اذا في حدا عم بيفتش بغراضنا، بس في وسائل اللي فيا تتخبا، الوسائل الهرمونية فيا تكون مخباية، فاذا حدا عم بصرّ على القذف الخارجي، طيب.. تمام.. خليكن عم تجربوا برّا بس بتكوني انتي ضامنتيها انو ما رح يصسر في حمل.

عايدة: اذا عندكن بعد اسئلة ما طرحناها بهال podcast فيكن تدقوا او تبعتوا whatsapp للخط الساخن للجنسانية خاصة اذا كنتوا ب لبنان او حتى اذا كنتوا بالعالم العربي او بلد ناطق باللغة العربية رقم التلفون هو 76680620.

فيكن تسألوا أسئلة مش بس عن القذف الخارجي فيكن تسألوا عن اي شي الو علاقة بالصحة الجنسية والانجابية بشكل عام والعلاقات والمفاوضات اللي بتصير ضمن العلاقات وغيرها من الامور.